ជាងជួសជុលរថយន្ត២នាក់ត្រូវរថយន្តក្រឡាប់សង្កត់បណ្តាលឲ្យរងរបួសធ្ងន់នៅពេលកំពុងជួសជុល….!
ភ្នំពេញ៖ ករណីរន្ធត់មួយដែលបុរស២នាក់ជាជាងជួសជុលរថយន្ត ត្រូវបានរថយន្តក្រឡាប់សង្កត់គៀបជាប់ខណ:កំពុងយកឌោយកង់រថយន្តដើម្បីចូលទៅជួសជុលនៅខាងក្រោមរថយន្ត។
ដោយហេតុការណ៍ដ៏គួរឲ្យរន្ធត់ខាងលើនេះ បានកើតឡើងកាលពីវេលាម៉ោង៩ និង០០នាទី ព្រឹក ថ្ងៃទី២៥ ខែធ្នូ ឆ្នាំ២០២២ ស្ថិតនៅតាមបណ្តោយផ្លូវជាតិលេខ៤កែងនិងផ្លូវបេតុង សង្កាត់ចោមចៅទី៣ ខណ្ឌពោធិសែនជ័យ រាជធានីភ្នំពេញ។
តាមការរៀបរាប់ពីអ្នកបើកបររថយន្តឈ្មោះ ប៉ែន សុនដារ៉ា អាយុ៤០ឆ្នាំ មុខរបរបើកបររថយន្តខាងលើបានឲ្យដឹងថា មុនពេលកើតហេតុរូបគាត់បានមកដឹកគ្រឿងសំណង់នៅម្តុំវត្តតាំងក្រសាំង ខណ្ឌពោធិសែនជ័យ យកទៅបោះឲ្យម៉ូយនៅខេត្តតាកែវ ដោយដឹកតាមរថយន្តប្រភេទដឹកទំនិញម៉ាកហ៊ីយ៉ាន់ដាយមួយគ្រឿងព៍ណស ពាក់ផ្លាកលេខ តាកែវ3A-3768បើកបរក្នុងទិសដៅពីលិចទៅកើតតាមបណ្តោយផ្លូវជាតិលេខ៤បម្រុងបត់ស្តាំតាមផ្លូវបេតុងចេញមកផ្លូវជាតិលេខ៣ ខណ:ពេលកំពុងតែបើកឡើងទួល ដោយរថយន្តដឹកធ្ងន់ពេកក៏បានបាក់ប៉ុងភ្លៅខាងក្រោយ ដោយស្ថានភាពយប់ពេក អ្នកបើកបរក៏ទុករថយន្តហើយដេកចាំនៅទីនោះអស់មួយយប់លុះព្រឹកឡើងក៏បានប្រជាការពារដែលស្គាល់ជាងបានជួយហៅជាងទាំង២នាក់នោះមកជួសជុលរថយន្តដែលខូចខាងលើនេះ ហើយអ្នកបើកបរបានជិះម៉ូតូឌុបទៅទិញគ្រឿងបន្លាស់ ដើម្បីឲ្យជាងផ្លាស់ប្តូរ ខណ:ជាងទាំង២នាក់កំពុងតែយកប្រដាប់ដូយរថយន្តមកដូយកង់រថយន្តនៅផ្នែកខាងក្រោយដើម្បីចូលទៅដោះប៉ុងភ្លៅរថយន្តនៅខាងក្រោមរថយន្ត បណ្តាលឲ្យផ្អៀងមួយជំហៀងផ្នែកខាងឆ្វេងក្រឡាប់សង្កត់ជាងទាំងពីរនាក់គៀបជាប់រងរបួសធ្ងន់ត្រូវបានប្រជាពលរដ្ឋរួមនិងអ្នកដំណើរជួយទាញយកជនរងគ្រោះទាំងពីរនាក់ចេញពីក្រោមរថយន្តរួចបញ្ជូនទៅកាន់មន្ទីរពេទ្យដើម្បីធ្វើការសង្រ្គោះភ្លាម ។ ចំណែកម៉ូតូដែលជារបស់ជាងរថយន្តរងការខូចខាតដោយរថយន្តសង្កត់លើនិងរងការខូចខាតផ្ទះជាងជួសជុលម៉ូតូយ៉ាងដំណំផងដែរ។
ក្រោយពេលកើតហេតុសមត្ថកិច្ចបានចុះមកពិនិត្យរថយន្តនិងធ្វើកំណត់ហេតុដើម្បីស្ទូចយករថយន្តខាងលើទៅរក្សាទុកនៅការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញដើម្បីដោះស្រាយគ្នានៅពេលក្រោយ។
