សង្ស័យរឿងគុំនុំខ្មាន់កាំភ្លើងមួយក្រុមបាញ់សម្លា.ប់ជនបរទេសម្នាក់ បណ្តាលឲ្យស្លា.ប់ពេលបញ្ជូនដល់មន្ទីពេទ្យ..!
ភ្នំពេញ ៖បុរសជាជនបរទេសម្នាក់ ត្រូវបានស្លា.ប់បាត់បង់ជីវិត ពេលដឹកបញ្ចូនទៅសង្គ្រោះនៅមន្ទីរពេទ្យ ក្នុងករណីបាញ់ប្រហារ ដោយខ្មាន់កាំភ្លើងមួយក្រុមមានគ្នាជាច្រើននាក់ ជិះរថយន្តស៊េរីទំនើបមួយគ្រឿង បានបើកទៅឈប់ក្បែរជនរងគ្រោះ ហើយដកកាំភ្លើងខ្លី បាញ់សំដៅជនរងគ្រោះចំនួន៣គ្រាប់បណ្តាលឲ្យដេកដួលស្លា.ប់ក្នុងថ្លុកឈាមតែម្តង។
ករណីខាងលើនេះ បង្កអោយមានការភ្ញាក់ផ្អើលកាលពីវេលាម៉ោង១២យប់ រំលងអធ្រាតឈានចូលថ្ងៃទី២៥ ខែធ្នូ ឆ្នាំ២០២២ ស្ថិតនៅក្រោមអគារ THE PEAK តាមបណ្តោយផ្លូវសប៊ិត ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។ជនរងគ្រោះពុំទាន់បានស្គាល់អត្តសញ្ញាណ ហើយក៏ពុំទាន់ត្រូវបានសមត្ថកិច្ចបញ្ជាក់ថាជាជនជាតិអ្វីនៅឡើយនោះទេ គ្រាន់ដឹងថា មានវ័យប្រមាណ៤០ឆ្នាំ ។
យោងតាមប្រភពព័ត៌មាន នៅកន្លែងកើតហេតុបាន អោយដឹងថា ដំបូងឡើយមុនពេលកើតហេតុ ជនរងគ្រោះបានទៅឈរនៅចំណុចកើតហេតុតែម្នាក់ឯង ។ ភ្លាមនោះស្រាប់តែលិចមុខ ជនសង្ស័យមួយក្រុមមានគ្នាជាច្រើននាក់ ជិះរថយន្តម៉ាកឡង់គ្រីសស័រ ពណ៌ស មិនចាំស្លាកលេខមួយគ្រឿង បានបើកទៅឈប់ក្បែរជនរងគ្រោះ រួចធ្វើសកម្មភាពដកកាំភ្លើងខ្លីបាញ់ស្រោចលើជនរងគ្រោះចំនួន៣គ្រាប់ បណ្តាលអោយដួលសន្លប់រងរបួសធ្ងន់ ហើយភ្លាមៗនោះក្រុមខ្មាន់កាំភ្លើង បានបើករថយន្តរត់គេចខ្លួនបាត់ស្រមោលពីកន្លែងកើតហេតុ បាត់តែម្តង ។
បន្ទាប់ពីកើតហេតុ សមត្ថកិច្ចចម្រុះ បានចុះមកដល់ទីតាំងខាងលើ នឹងបានទំនាក់ទំនងទៅកាន់រថយន្តសាម៉ុយអោយទទួលយកជនរងគ្រោះបញ្ចូនទៅមន្ទីរពេទ្យកាល់ម៉ែត្រ ដើម្បីសង្គ្រោះ ប៉ុន្តែជាអកុសល ជនរងគ្រោះបានដាច់ខ្យល់ស្លា.ប់ ពេលបញ្ចូនដល់មន្ទីរពេទ្យ ។ ក្រោយការស្លា.ប់ ស.ពត្រូវបានសមត្ថកិច្ចដឹកយកទៅតម្កល់នៅវត្តស្ទឹងមានជ័យ ដើម្បីពិនិត្យធ្វើកោសល្យវិច្ច័យ ។
ក្នុងនោះផងដែរ គេសង្គេតឃើញមានវត្តមានរបស់ លោកឧត្តមសេនីយ៍ទោជាវ វិបុល អនុប្រធាននាយកដ្ឋាននគរបាលព្រហ្មទណ្ឌ ក្រសួងមហាផ្ទៃ បានដឹកនាំក្រុមមន្ត្រីនគរបាលជំនាញ ចុះពិនិត្យ ភស្តុតាង និងវត្ថុតាងជុំវិញទីតាំងកើតហេតុ ដើម្បីបន្តសហការជាមួយសមត្ថកិច្ចមូលដ្ឋាន និងនគរបាលពាក់ព័ន្ធ ក្នុងការបើកការស្រាវជ្រាវបន្ត ដើម្បីឈានទៅចាប់ខ្លួនក្រុមខ្មាន់កាំភ្លើងដែលបាញ់ប្រហារមិនញញើតដៃ យកទៅផ្តន្ទាទោសទៅតាមផ្លូវច្បាប់ ។
ជុំវិញអំពើបាញ់ប្រហារដ៏សាហាវខាងលើនេះ គេនៅមិនទាន់ដឹងថា ជាការបាញ់សម្លា.ប់ ដោយផ្តើមចេញពីករណីអ្វីអោយប្រាកដនៅឡើយនោះទេ ប៉ុន្តែជាជំហ៊ានដំបូង សមត្ថកិច្ចដាក់ការសង្ស័យថា អាចជាករណីគំនុំ៕
