ឃាត់ខ្លួនជនសង្ស័យ ករណីធ្វើសកម្មភាពលួចទ្រព្យសម្បត្តិ ក្នុងផ្ទះប្រជាពលរដ្ឋមួយកន្លែងស្ថិតនៅសង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ…!
ភ្នំពេញ ៖ កាលពីល្ងាចថ្ងៃទី១៨ ខែធ្នូ ឆ្នាំ២០២២ នៅក្នុងបុរីសន្តិភាព២ ភូមិដំណាក់ត្រយឹង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យ កន្លងមក របស់អ្វីក៏លួចដែរឱ្យតែលក់បានលុយ គឺលួចយកទាំងអស់ និងលួចបានសម្រេចច្រើនដងមកហើយ ។ ដោយឡែក ពេលនេះបានចូលទៅធ្វើសកម្មភាពលួចទ្រព្យសម្បត្តិនៅក្នុងផ្ទះមួយកន្លែង ប៉ុន្តែលួចពុំទាន់សម្រេចនៅឡើយទេ ក៏ត្រូវបានម្ចាស់ទាន់រាយការណ៍ប្រាប់នគរបាលឲ្យជួយអន្តរាគមន៍។
នគរបាលរួមជាមួយកម្លាំងប្រជាការពារសង្កាត់និងភូមិបានចេញទៅកាន់ទីនោះភ្លាមៗ ហើយដោយមានការសហការណ៍ពីប្រជាពលរដ្ឋផងនោះ បាននាំគ្នាឡោមព័ទ្ធកន្លែងកើតហេតុជុំជិត ។ ខណៈនោះធ្វើឲ្យជនសង្ស័យភ័យស្លន់ស្លោ ក៏បានរត់ឡើងទៅលើដំបូលផ្ទះ ហើយក៏ត្រូវកម្លាំងសមត្ថកិច្ចខាងលើឡើងទៅឃាត់ខ្លួនបានតែម្ដង។
ជនសង្ស័យនេះ ឈ្មោះគង់ ខ្លឹម អាយុ២៥ឆ្នាំ មុខរបរដើររើសអេតចាយ មានស្រុកកំណើត ភូមិក្រោលគោ ឃុំក្រោលគោ ស្រុកស្វាយជ្រុំ ខេត្តស្វាយរៀង ។ បច្ចុប្បន្នស្នាក់នៅមិនពិតប្រាកដនោះទេ យប់ត្រង់ណាដេកត្រង់នោះតែម្ដង ជនសង្ស័យរូបនេះក៏មានបក្សពួក២នាក់ទៀតដែរគឺម្នាក់ឈ្មោះអាសិដ្ឋ និងម្នាក់ទៀតមានរហស្សនាម«អាខ្មោច» ដែលកំពុងរត់គេចខ្លួន។ក្រុមនេះគ្រាន់តែយកមុខរបររើសអេតចាយមកបិទបាំងប៉ុណ្ណោះ ប៉ុន្តែការពិតពួកនេះគឺមានជំនាញខាងលួចទ្រព្យសម្បត្តិខ្លាំងណាស់ហ៊ានតែប្រហែសគឺមិនបានឡើយ កន្លងមកមានអ្នករងគ្រោះដោយសារក្រុមនេះច្រើនមកហើយ។
ជនសង្ស័យម្នាក់នេះបានធ្វើសកម្មភាពចូលលួចទ្រព្យសម្បត្តិនៅក្នុងភូមិនេះ ហើយត្រូវបានអ្នកភូមិចាប់បាន ដោយដាក់ក្នុងរ៉ឺម៉កម៉ូតូបម្រុងយកទៅប្រគល់ឲ្យនគរបាល ប៉ុន្តែជននេះបានរត់គេចខ្លួនបាត់ ។លុះដល់វេលាល្ងាចថ្ងៃដដែលបានចូលទៅលួចទ្រព្យសម្បត្តិនៅក្នុងផ្ទះមួយនៅក្នុងភូមិនោះទៀត ប៉ុន្តែត្រូវម្ចាស់គេទាន់ ក៏ប្ដឹងនគរបាលប៉ុស្តិ៍ចោមចៅទី២ ឲ្យជួយអន្តរាគមន៍ហើយ
នគរបាលរួមជាមួយប្រជាការពារក៏ចុះទៅឡោមព័ទ្ធភ្លាមៗ។
ប្រភពព័ត៌មានបានឲ្យដឹងថា ជនសង្ស័យភ័យស្លន់ស្លោរខ្លាំងណាស់រត់ចុះក្រោមអត់ទាន់ ក៏បានរត់ឡើងទៅពួនលើដំបូលផ្ទះកើតហេតុនោះ បង្កឲ្យមានការភ្ញាក់ផ្អើលដល់អ្នកភូមិ ។ ពេលនោះអ្នកភូមិក៏បានធ្វើការឡោមព័ទ្ធនៅជុំវិញផ្ទះកើតហេតុ និងនៅតាមបណ្ដាផ្លូវនានាក្នុងបុរីនោះ គឺទោះជាជននេះចង់រត់តាមផ្លូវណាក៏រត់មិនរួចដែរ ។ ចំណែកនគរបាលបានស្រែកឲ្យជននេះចុះក្រោមតែមិនព្រមចុះសោះ ទើបកម្លាំងនគរបាលឡើងទៅចាប់ខ្លួនដល់លើដំបូលផ្ទះរួចបណ្ដើរចុះមកក្រោម ។ ពេលនោះដោយសារកន្លងមកបាត់របស់ទ្រព្យអត់ស្វាងទើប មានអ្នកខ្លះទប់កំហឹងមិនបានក៏នាំគ្នាវាយទាត់ធាក់ម្នាក់១ដៃម្នាក់១ជើង ចំណែកនគរបាលឃាត់មិនចង់ឈ្នះ។ នគរបាលក៏នាំជននោះទៅសាកសួរនៅប៉ុស្តិ៍ ដើម្បីកសាងសំណុំរឿងចាត់ការតាមច្បាប់ ៕
