បាញ់ប្លន់មន្រ្តីប៉ូលិសព្រំដែនម្នាក់កំពុងយកមាសទៅឲ្យប្រពន្ធលក់នៅផ្សារស្ទឹងមានជ័យចាស់់អស់ជាង២០ម៉ឺនដុល្លារអាមេរិកផ្អើលឈុល….

 

ភ្នំពេញ-ប៉ូលិសព្រំដែនម្នាក់រងរបួសបែកក្បាលខណ:កំពុងវេចមាសផ្លាកទីននិងលុយយកទៅឲ្យប្រពន្ធដាក់លក់ក្នុងផ្សារស្ទឹងមានជ័យចាស់ ត្រូវបានចោរមួយក្រុមស្ទាក់ប្លន់យកទៅអស់រលីង។

ហេតុការណ៍បាញ់វាយប្លន់ខាងលើនេះបានកើតឡើងកាលពីវេលាម៉ោង៧និង៣០នាទីព្រឹកថ្ងៃទី១៨ ខែឧសភា ឆ្នាំ២០២៣ ស្ថិតនៅចំនុចក្នុងផ្សារស្ទឹងមានជ័យចាស់ ក្រុម១ ភូមិមានជ័យ២ សង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ។

ជនរងគ្រោះខាងលើមានឈ្មោះ អ៊ន ហៀក ភេទប្រុសអាយុ៥៥ឆ្នាំ មុខរបរមន្ត្រីប៉ូលិសព្រំដែន ស្នាក់នៅផ្ទះលេខ៧៨ ក្រុម២ ភូមិមានជ័យ២ សង្កាត់ស្ទឹងមានជ័១ ខណ្ឌមានជ័យ។

ចំណែកប្រពន្ធឈ្មោះ អ៊ុង ផល្លា អាយុ៥២ឆ្នាំ មុខរបរលក់មាស ស្នាក់នៅជាមួយគ្នា។

យោងតាមប្រភពព័ត៍មានពីជនរងគ្រោះបានឲ្យដឹងថា មុនពេលកើតហេតុជនរងគ្រោះបានស្ពាយមាសទឹក១០ចំនួន១២តំលឹង ផ្លាកទីនទឹក៧និងទឹក៣ចំនួន២០០តំលឹង និងលុយខ្មែរ១៥០០០០០រៀល ចេញពីផ្ទះរបស់គាត់រួចដើរទៅតូបលក់មាសរបស់ប្រពន្ធគាត់នៅក្នុងផ្សារស្ទឹងមានជ័យចាស់ ស្របពេលនោះក៏មានជនសង្ស័យចំនួន៤នាក់ជិះម៉ូតូ២គ្រឿងប្រដាប់ដោយអាវុធខ្លី១ដើមជិះតាមគាត់ពីក្រោយហើយដកកាំភ្លើងវាយក្បាលរបស់គាត់រួចប្រតាយប្រតបគ្នាដណ្តើមយកកាបូបដាក់គ្រឿងអលង្ការបស់គាត់រួចបាញ់គំរាមក្រុមអាជីវករចំនួន៣គ្រាប់ ហើយនាំគ្នាជិះម៉ូតូរត់គេចខ្លួនបាត់ស្រមោលតែម្តង។

ក្រោយពេលកើតហេតុកម្លាំងសមត្ថកិច្ចប៉ុស្តិស្ទឹងមានជ័យទី១ កម្លាំងជំនាញនគរបាលខណ្ឌមានជ័យ កម្លាំងព្រំទណ្ឌកំរិតធ្ងន់និងស្រាលនៃស្នងការដ្ឋាននគរបាលរាជធានីភ្នំពេញ កម្លាំងអាវុធហត្ថខណ្ឌនិងក្រុង កម្លាំងនគរបាលនាយកដ្ឋានព្រហ្មទណ្ឌក្រសួងមហាផ្ទៃបានចុះទៅទីតាំងកើតហេតុដើម្បីបើកការដ្រាវជ្រាវតាមកាំម៉ារ៉ាសុវត្ថិភាពដើម្បីកំណត់មុខសញ្ញាក្រុមជនសង្ស័យខាងលើស្វែងរកចាប់ខ្លួនយកមកផ្តន្ទាទោសតាមផ្លូវច្បាប់នៅពេលក្រោយ៕