ជនសង្ស័យ៦នាក់ក្នុងចំណោមបក្ខពួក៧នាក់ត្រូវបានសមត្ថកិច្ចខណ្ឌដង្កោឃាត់ខ្លួនបានជាបន្តបន្ទាប់ក្រោយពីធ្វើកម្មភាពប្រេីកាំបិត និងដុំថ្ម គប់និងកាប់ទៅលេីបុរសពីរនាក់ឱ្យរងរបួសធ្ងន់…

 

 

ភ្នំពេញ:នៅព្រឹកទី០៧ ខែមីនា ឆ្នាំ ២០២៣ កម្លាំងនគរបាលព្រហ្មទណ្ឌ នៃអធិការដ្ឋាននគរបាលខណ្ឌដង្កោ សហការជាមួយនគរបាលប៉ុស្ដិ៍រដ្ឋបាលព្រៃស បានធ្វេីការឃាត់ខ្លួនជនសង្ស័យសរុប០៦នាក់ក្នុងចំណោមបក្ខពួក០៧នាក់ បន្ទាប់ពីក្រុមនេះធ្វេីសកម្មភាពប្រេីកាំបិត និងដុំថ្ម គប់និងកាប់ទៅលេីបុរសពីរនាក់ឱ្យរងរបួសធ្ងន់កាលពីយប់ថ្ងៃទី០៥ ខែមីនា ឆ្នាំ២០២៣កន្លងទៅថ្មីៗ។

ជនសង្ស័យទាំង០៦នាក់ខាងលេីនេះ សមត្ថកិច្ចនៅមិនទាន់បញ្ចាក់ពីអត្តសញ្ញាណនៅឡេីយទេ ខណៈកំពុងតាមស្រាវជ្រាវរកបក្ខពួកម្នាក់ទៀតដែលកំពុងរត់គេចខ្លួន ។

លោកវរសេនីយ៍ទោ ជាង ហុកសែ អធិការរងទទួលផែនព្រហ្មទណ្ឌខណ្ឌដង្កោ បានបញ្ចាក់ប្រាប់ថា នៅយប់ថ្ងៃទី០៥ ខែមីនា ឆ្នាំ ២០២៣ មានបុរសរងគ្រោះ០២នាក់ ត្រូវបានជនសង្ស័យមួយក្រុមមានគ្នា០៧នាក់ ប្រដាប់ដោយកាំបិត និងដុំថ្ម ធ្វេីសកម្មភាពគប់ និងកាប់ បណ្ដាលឱ្យរងរបួសធ្ងន់ ហេីយត្រូវបានបងប្អូនប្រជាពលរដ្ឋដឹកយកទៅសង្គ្រោះនៅមន្ទីរពេទ្យភ្លាមៗ ។      ក្រោយពីទទួលបានពាក្យបណ្ដឹងពីក្រុមគ្រួសារជនរងគ្រោះ និងក្រោមការ បញ្ចាផ្ទាល់ពីលោកវរសេនីយ៍ឯក ជឹម សុីថា អធិការនគរបាលខណ្ឌដង្កោ លោកអធិការរងទទួលផែនព្រហ្មទណ្ឌខណ្ឌដង្កោ បានដឹកនាំកម្លាំងជំនាញធ្វេីការស្រាវជ្រាវនិងឃាត់ខ្លួនជនសង្ស័យបាន០៦នាក់ជាបន្តបន្ទាប់ នៅថ្ងៃទី៦ និងទី៧ ខែមីនា ២០២៣នេះ ខណៈដែលបក្ខពួកម្នាក់ទៀតដឹងខ្លួនរត់គេចខ្លួនបាត់ស្រមោល ។

បច្ចុប្បន្ន នេះ ជនសង្ស័យ០៦នាក់ និងវត្ថុតាង ត្រូវបានសមត្ថកិច្ចជំនាញ បញ្ចូនទៅអធិការដ្ឋាននគរបាលខណ្ឌដង្កោ ដេីម្បីកសាងសំណុំរឿងចាត់ការទៅតាមនិតិវិធីច្បាប់ ៕